كيفية المزاكرة الجيدة

طبعا بمناسبة دخول الامتحانات ع الابواب و اللى لا كانت ع البال و لا ع الخاطر و طبعا 90 % مننا مش فاهم اى حاجه ف اى حاجه ف المنهج و انا اولكو طبعا

فكرت انفع الناس اللى ناوية تذاكر

دورت كتير على طرق للمذاكرة و جمعت شوية طرق كدا و قولت اقولها لأصحابى و زوار مدونتى الغاليين

1. لازم اول حاجه تبقى بتذاكر على مكتب او على ترابيزه فى مساحة كويسة حوليك و انت بتذاكر لان دا بيبقى ليه تأثير نفسى كبير على اللى ناوى يذاكر ان شاء الله. و كمان لازم تكون بتزاكر فى اضاءة كويسه و تكون بيضا و بلاش اللمبات الصفرا الجامده دى احنا ف 2013 يعنى اللمبات الصفرا دى خلصت خلاص :D و كمان لازم تكون ف هدوء مش جمب التليفزيون ولا تشغل اغانى على اللاب و انت قاعد او انتى قاعدة و الكلام دا....
2. افهم كويس عنوان المادة اللى انت بتزاكرها ايه علشان تعرف تفهم الكلام اللى مكتوب ف ام الكتاب  و تعلم على العناوين المهمة اللى سمعت عنها فى اى محاضره او حصة حضرتها و تقراها كويس...
3. لازم تاخد وقت راحه كل فتره بس مش بالطريقة اللى احنا بنعملها دى يعنى مش نزاكر ربع ساعة و نقعد ساعتين راحه على اللاب :D المفروض و الصح تقعد حوالى من 20 ل 30 دقيقة تزاكر متواصل بس مزاكرة بجد و متركزش فى اى حاجه حواليك الا المزاكرة و بعدين تاخد حوالى 10 دقايق او ربع ساعه راحه بالكتير اوى اوى اوى علشان المعلومات تثبت فى دماغك بأذن الله و تريح مخك كمان لأن الشغل المتواصل كدا مش هيخلى كل المعلومات تثبت ف دماغك و لو حسيت انك زهقت بجد مش تلكيك ف انت ممكن تاخد وقت راحة اكبر من كدا يعنى ساعه ساعتين بس بعد الساعه ساعتين هترجع و تقرص على نفسك شويه ف اول وردية مزاكرة بعد الراحله هههههههه..
4. جينا دلووقتى علشان تعمل اختبار لنفسك و تشوف انت زاكرت كويس و فهمت حاجه ولا لأ
   بعد ما تحس انك خلاص كدا زاكرت الحمد لله الجزء اللى انت كنت عايز تزاكره تعمل لنفسك اسئلة على ورق تانى غير اللى كنت بتزاكر فيه عن الكلام اللى انت زاكرته و طبعا دا بامانتك بقى مع ربنا هههههه
   المهم يا اما انت و ضميرك و تحل و تقيم نفسك ام تعمل لنفسك لجنة امتحان ف البيت و تقول لأى حد من اسرتك ف البيت انه يقف معاك و انت بتحل علشان تشوف انت عملت ايه ف المزاكره و تصحح لنفسك انت او تخلى اى حد بردو يصححلك...
5. اياك و حشى دماغك بالمعلومات و خلاص لا طبعا و دا اكبر غلط و انا اكتر واحد مجرب الموضوع دا و الله
   لازم تدى لنفسك وقت قبل المادة بفترة طويله على حسب فهمك انت للمادة لو ابيض فيها يبقى من دلوقتى تبدأ تلمها بحيث ان يوم الامتحان يبقى يوم مراجعة ليك مش اكتر و تبقى اساسا المعلومات ف دماغك بس انت مجرد بتفتكرها لان حوار انك تفتح الكتاب لاول مره ليلة الامتحان دا مش ممكن هينفعك ولو انت عملت كدا يبقى ملهاش لزمه تزاكر اصلا لأن المعلومات اللى هتفضل ف دماغك لحد الامتحان من هتكمل 20 % من اللى انت حاولت تفهمه.....
6. قرر المادة اللى انت هتزاكرها و اعمل فى دماغك نقط معينة كدا ف و اكتبها ف ورقة علشان تزاكر بخطه انت حاططها لنفسك  
7. قبل ما تبدأ مزاكرة لازم تحط ف دماغك و تقنع نفسك انك قدها و بتزاكر علشان تبقى حاجه محترمه لنفسك مش لغيرك و محدش هياخد نتيجتك يعلقها على ضهره نتيجتك دى ليك انت و بس و انت اللى هتستفاد بيها علشان تشتغل كويس و تكسب كويس و تلاقى بنت الحلال المتعلمه زيك و متربية لأن عمر ما واحده متعلمه و محترمه و بنت ناس هتاخد واحد مش متعلم يعنى مفيش مهندسه او محاسبة مثلا هتاخد ميكانيكى او سواق على عربية نقل مثلا كله ليك.....
8. زاكر بجد و خليك نشيط دايما يعنى مش تقعد تقلب ف الصفح كدا و مش مهتم لا طبعا   لازم تزاكر و تقرا كل كلمة باهتمام لأننا بنتكلم كل دا علشان نبقى ماس كويسه و ننفع نفسنا ف الاخر باذن الله
9. ذاكر علشان تبقى حاجه بنفسك فعلا و عن اقتناع مش تزاكر علشان ابوك اداك كلمتين ف عضمك و قالك تقعد تزاكر او علشان ترضى نفسك و خلاص.....

طبعا لو كل الكلام دا منفعكش يبقى عليك و على البرشام بقى ههههههههههههههههههههههههههههههههههههههههههههههه

طيبعا لا لازم تعرف بجد انك لما تزاكر هتبقى كويس جدا جدا و هتلاقى فرص احسن فى حياتك ...